العودة   منتدى العرب المسافرون الحقيقي > بوابات السفر لدول الخليج العربي > بوابة السفر الى دولة قطـر Qatar


إضافة رد
 
أدوات الموضوع انواع عرض الموضوع
  #1  
قديم 02-27-2015, 09:15 PM
قصمنجية
قصمنجية غير متصل
عضو
مسافر جديد
 
معلومات العضو
التسجيل: Feb 2015
العضوية: 22261
المشاركات: 15 [+]
بمعدل : 0.01 يوميا
اخر زياره : [+]
افتراضي 3 ليالي في قطر تعالو اقولكم وين سكنت ووين رحت ..؟



السلام عليكم ورحمه الله وبركاته

اخباركم ان شاء الله بخير محدثتكم من الرياض .. اخباركم مع جونا الغريب مره برد ومره حر والشئ الغريب جو البيت صقيع وبرا البيت حر
اهل جده كيفكم الله يعينكم يارب على الانهار اللي عندكم وربي يرحمكم برحمته .. معانتكم من سنه وللحين ماتعدل شئ ..

نرجع لموضوعنا ..

رحنا لقطر عن طريق البر لمده 4 ايام و3 ليالي


الجو هناك مررره حلو وعلييييل لا هو برد ولا هو حر مره حلووو .

لاحظت اغلبهم معاهم سيارات جيب يعني في المواقف والاشاره بين جيب وجيب .. جيب هههه
الجيوب عليها طلب كبير .. الله يهنيهم ..

الاجانب عندهم مقارنه بدبي قليييل جدااا

اسواقهم مافيها احد .. مدري ليه ! يعني مو زحمه ابد

شبابهم للحين محافظ على الزي الرسمي ثوب وشماغ الله لا يغير عليهم ..

ماشفت عوايل كثيره قطريه في السوق ..

اممممم الشئ اللي مو حلو انهم مثلنا مو كلهم << ماتحب تعم
المهم مايهمهم النظام المروري يعني مثلا وانت تمشي بالرصيف على رجولك ماتدري الا واحد يمشي بالجيب على الرصيف نفس حالتنا - سرعه -
الشعب بشكل عام محـــــــترم جدااا من تسأل يجاوبونك .. خدومين ..

الشوارع نظيفه

الكورنيش حجر يعني مو رمل وفيه ممشى وثيل << عاد تخيلوه ههههه

المباني عندهم حلوه واشكالها روعه خاصه بالليل والانوار وبرج اللي فيه التلفزيون والمحللين والملعب بس العماير مو كثيره ..

الغلاء = عادي نفسنا في كل شئ يعني فيه فنادق غاليه ومطاعم غاليه وفيه العكس

الاسواق = قليله مقارنه بدبي ويكفيها قطر 4 ايام

كانت فيه مباره اوزباكستان مع استراليا << مدري صح اوزباكستان
المهم لمن طلعو من المباراه قفلو الشوارع عشان يمشون العالم بعدين يمشون الجمهور
واغلب الجمهو هنود ههههه عاد من يشجعون ماندري

الحلو في قطر ان اسواقهم محترمه يعني مايشوف الواحد مناظر غلط من عدم احتشام بعض الاجانب .. حتى اغلب العرب متحجبين ..

اوكي هذا كله اللي فوق حبيت فيه اوضح اللي انا شفته

نجي للمعلومات

حجزنا شقق من موقع اقودا اسم الشقق Bridge Street Worldwide
عباره عن 3 غرف نوم (غرفه بسرير مزدوج وغرفتين كل وحده فيها سريرين مفرد )ومطبخ وصاله و4 دورات مياه بـ 580 ريال قطري

على فكره هي اخر غرفه بالشقق واخذناها مع اني انا وزوجي ومعي طفلين يعني غرفه او غرفتين تكفينا عاد خلينا غرفه للملابس والاغراض ههههه

الشقه نظيفه ومررررره وسيعه فيها طاوله طعام لـ 6 اشخاص وفيه تلفزيون بلازما ومسرح منزلي وفيها كنب بالصاله نظيف والاثاث كله مودرن بس مو فخم يعني عادي وفيه غساله ملابس اتوماتيك وطاوله وكوايه

المطبخ مؤثث فيه مكرويف وفرن كهربائي وهيتر وكاسات وصحون وقدور واشياء كثيره يعني موثث

الاناره فيه حلوه
المهم المشكله الوحيده ان الانترنت عندهم خربان ولا قدرنا نحجز الليله الثانيه فيه ومع الوقت وطلعنا نسينا ولمن طلبنا منهم اننا نمدد رفضو وقالو محجوزه ولازم تطلعون الساعه 1 الظهر .. المهم رتبنا الاغراض وهم من 12 الظهر يدقون نقولهم طيب ويدقون مره ثانيه ابلشونا بقوووه لدرجه ان اول ماطلبنا واحد يجي ياخذ الاغراض جو جيش اللي ينظفون ووحده مديره ورايحه جايه واقلقتنا حسيت ان اللي حاجز الشقه رئيس الفلبين

ضايقونا بهالشئ وطلعنا زعلانين والمديره تلحقنا وتركب الاغراض وانا اوكي بنطلع بس مو هالاسلوب ..

المهم النظره العامه للشقق مافيها ولا عربي ولا خليجي ولا اجنبي << اجل وش فيه
كلهم العاملين والمنظفين والساكنين من الفلبين

المهم انا كنت ماخذه رقم شقق رتاج ان وطلعنا ودقينا عليهم وكلمنا الأخ فكري مصري الجنسيه .. صراحه انسان محترم وعطانا شقه من غرفه وحده وصاله ودوره مياه وحده
اللوبي طبعا عاد بس ريحه الورد الطبيعي مره حلوه والشقه نظيييفه واثاثها مررررره فخم مو مثل الشقه اللي كنا فيها قبل هذيك صات عاديه عند هذي ..
هذي حسيتها مثل فنادق لاس فيغاس الاثاث مره راقي والشقه نظيفه فيها مطبخ كاونتر ومأثث ومكرويف وفرن وهيتر وكراسي طويله عالكاونتر والصاله مره مودرن وبلازما واضاءه رومااانسيه مرررره انصحكم فيها .. فيها غساله اتوماتيك وطاوله وكوايه ..

العيب فيها دوره المياه صغيره مثل الشقه اللي قبل

موقعها مو حلو .. عند بيوت خرابه بس فيه كم عماره جديده .. اممم صار لنا موقف واحنا راجعين بالليل الساعه 2
واحنا داخلين بالحواري طبعا ظلام ندور شقتنا المهم وواحد قبالنا جاي طاير .. الى الحين عادي
المهم ويديور ويلحقنا ويكبس النور ويطفي النور وورانا
يبينا نوقف المهم ماوقفنا وصرنا نمشي ونلف يمين يسار وهو ورانا ويوم قربنا نطلع للشارع العام لف وراح
مررره خفنا لأنه صار يمشي بنور طافي فا مانشوفه

المهم رجعنا لشقتنا واحنا نتلفت وندخل المواقف واخذ عيالي وندخل .. عاد يوم طلع زوجي الظهر للسياره ويحصل ورقه عليها رقم جوال والورقه مكتوب فيها من ورا وزاره الداخليه مستشفى ... ولا فيه تكمله لأنه قاطعها وكاتب فيها الرقم ..

يعني انتبهو ..
جرام والله الشقه تهبببل ومررره رومانسيه ومودرن بس عيبها الموقع .. يعني الواحد ياخذ حذره مع ان فيه سكيرتي بالمواقف .. مدري وين كان ذاك اليوم يوم رجعنا لأنه ماكان موجود ..

فيه مغسله لمن تطلع من الشقه تمشي يسار تحصل مغسله غسلو ثوب زوجي بـ 8 ريال بعد التخفيض ويوم جا ياخذه من بكرا طلع مفقل المحل واخذه بالليل ولا استفاد من غسلته ..

اوكي الشقق كلها فيه غساله ملابس وطاوله كوي وكوايه وهيتر ومكرويف وفرن وفيها مواقف خاصه ..


نجي للأماكن اللي رحنا لها

رحنا سوق فلاميجو << ان شاء الله السبينق صح
وسوق حياة اللي جنب فلاجيو
ورحنا سوق سيتي سنتر الدوحه
الاسواق فاااضيه
الا سوق فلاجيو هذا فيه ناس وفيه نهر وحلو مره وجنب الاستاد الرياضي
ورحنا سوق الوقف << مااعجبني
ليش مااعجبني كله مطاعم الطاولات برا والشيش تقل محترق السوق وانا مااحب اشم ريحه الشيشه ولا ابي عيالي يتنفسون هالسم المهم كنا نمشي وحصلنا واحد يسوي هذاك اللي مثل العجينه السايله يحطها على صاج ويحط عليها جبن وبعدين يصفطها ونفس الشئ يسويه بتشوكلت النوتلا ..
كان فيه عرض سوري لابسين اللبس السوري القديم ويرقصون بس ماوقفنا نشوفه حسيته عادي مره
وفيه محلات عطاره ومحلات ملابس كأنه قصر الحكم اللي في الرياض يعني السوق مو ذاك الزود فيه طيور وعصافير وحيوانات اليفه يعني مثل سوق ام الحمام في الرياض .. وكل شئ عندهم عادي مو شئ غريب
بس فيه محل يبيع تلفزيونات قديييييييييييمنه << هذا الشئ الغريب بس هههه
موقف صار لنا ولدي الله يخليه لي مركبته عربيه والله يكرمكم طاح شوزه ولا انتبهنا واحنا نمشي الا الباكستانيين الحمالين يصرخون وينادون واحنا وش السالفه وش سوينا !! هههههه ماشاء الله امينين
الكورنيش كان هوا ماقدرنا نجلس فيه ..
كنا بنروح سوق لاند مارك والولو بس حسينا مثله مثل اي سوق ليش نقعد نحوس وونضيع وقت واخرته نفس الشئ ونفس المحلات والسينما وكل شئ
..

تغدينا في مطعم ليالي في شارع سلوى او طريق سلوى - طريق مشهور هناك
المطعم اكله مرررررررره حلو اخذنا كباب لحم تحسونه فريش واخذنا حمص بالشاورما واخذنا عرايس دجاج كانت مره حلوه واخذنا صحن بطاطس وعصير برتقال وببسي = حسابنا 200
الكباب كان صحن بـ 69 ريال
الحمص بحدود 35
الببسي بـ 12 او 15 مااتذكر بس مو اقل وهو قزازه كولا ابو ريالين ههههه

الاكل رائع ولذيذ
المكان سئ حاطين الرجال بجهه والنساء والعوائل مع بعض بس بدون فاصل بس الويتر يقولك
لمن رحنا ماكان فيه عوائل
كله نساء ويشيشون عاد اول مادخلنا قلت بروح لهالطاوله لأن اللي جنبنا ماتشيش مادرينا الا يوم جلسنا والطلب جا الا بدت تشيش ومانشوف الا الدخاااان واللي جنبها خلصت شيشه وبدت بالدخان ..
الله وكيلكم الريحه تجيب المرض ..
وقسم الرجال نفس الشئ دخان << والله لاني اكره الدخان والشيشه دايما يصادفني خخخ

اللي قهرني ان اللي يشيشون البنات كلهم متحجبات حتى في سوق وقف كله متحجبات ويشيشون صراحه منظر سئ .. الله يهديهم يارب ( جد المرأه شكلها سئئ وهي تشيش ولا تدخن )

المهم باقي الوقت ندور بالسياره ملينا مافيه اماكن ولا حدايق حلوه ولا اماكن ترفيه ملاهي او شئ .. يعني مدري وين يروحون اهل قطر وين يتمشون .. وين يودون عيالهم غير الاسواق ..

بس في سوق فلاجيو فيه جهه فيها ملاهي لعبه او لعبتين تنفع للكبار ..


اتمنا اكون اسعدتكم بقرايه موضوعي وخدمتكم
ومشكورين

والله يوفق الجميع


ورده للكل ولأهل قطر الكريميين

مواضيع من نفس القسم:
رد مع اقتباس


  #2  
قديم 02-28-2015, 01:58 AM
*روحي تحبك*
*روحي تحبك* غير متصل
عضو
مسافر
 
معلومات العضو
التسجيل: Feb 2015
العضوية: 612
المشاركات: 60 [+]
بمعدل : 0.05 يوميا
اخر زياره : [+]
افتراضي

الحمد لله على السلامه أختي

حبيت أسألك عن الطريق إن كنتم رحتوا عن طريق البرر مع أي طريق ووش رأيك فيه ؟؟

ولو تكرمتي أبي أرقام الشقق الأولى وشقق ريتااج وهل أسعارهم معقوله لغرفتين وصاله يعني بحدود كم تقريبآ ؟؟

وأخيرآ حسيت إنكم ماعطيتوا قطر حقه يعني وينكم عن الحي الثقافي وجزيرة اللؤلؤه وحديقة

سباير زون لأن هالأماكن من أهم معالم قطر السياحيه وشكرآ مقدمآ بس ياقلبي لاتتأخرين على بالأرقام

رد مع اقتباس
  #3  
قديم 02-28-2015, 01:58 AM
قصمنجية
قصمنجية غير متصل
عضو
مسافر جديد
 
معلومات العضو
التسجيل: Feb 2015
العضوية: 22261
المشاركات: 15 [+]
بمعدل : 0.01 يوميا
اخر زياره : [+]
افتراضي

المشاركة الأصلية كتبت بواسطة *روحي تحبك* الحمد لله على السلامه أختي


حبيت أسألك عن الطريق إن كنتم رحتوا عن طريق البرر مع أي طريق ووش رأيك فيه ؟؟
ولو تكرمتي أبي أرقام الشقق الأولى وشقق ريتااج وهل أسعارهم معقوله لغرفتين وصاله يعني بحدود كم تقريبآ ؟؟
وأخيرآ حسيت إنكم ماعطيتوا قطر حقه يعني وينكم عن الحي الثقافي وجزيرة اللؤلؤه وحديقة
سباير زون لأن هالأماكن من أهم معالم قطر السياحيه وشكرآ مقدمآ بس ياقلبي لاتتأخرين على بالأرقام
الله يسلمك رحنا عن طريق الرياض سعد والطريق سيدين وحسيتها قريبه والطريق ماعليه انتبه اذا بتروح في الليل لأنه فيها ابل كثير واحنا في النهار كان جمل يركض خايف من السياره اللي بالسيد الثاني واضطرينا نوقف بسرعه (ديناصور مو جمل ) ههههه
شئ ثاني يمكن فيه تقاطع او تقاطعين انتبه من الشاحنات يقطع ولا كأن فيه اوادم

واخوي هذي رحلتنا الثانيه لقطر اول مره كان على وقت فلم ذا كنقدم اللي كان ممنوع في الخليج وقطر هي اللي مامنعته فرحنا نشوفه ونفس الوقت تمشيه ..
وهالمره رحنا تمشيه ومدري ماتحمست اروح لجزيره اللؤلؤ قريت تقرير هنا وشفت صور فحسيته عادي ..

حديقه سباير زون هذي اعتقد جنب مجمع فلاجيو لأننا نشوف اللوحه اللي تودي سبايرو فتودينا للمجمع يمكن كانت اللي جنبه كأنها مسطحات خضراء مدري يمكن تكون هي ..


بالنسبه لأرقام الشقق الاولى
BridgeStreet Worldwide
T: +974 44666870/1/2
Toll Free line: +974 8000 104
اخذناها بـ 580 ريال قطري وهي عباره عن 3 غرف نوم وكل غرفه دوره مياه وصاله ومطبخ ودوره مياه رابعه




والثانيه
رتاج ان
00974 44279100
الأخ فكري
اخذناها غرفه وصاله ودوره مياه وحده وفيها كورنر فيه المطبخ بـ 450 ريال قطري




اتمنى اكون افدتك


رد مع اقتباس
  #4  
قديم 02-28-2015, 01:58 AM
the ro0ok
the ro0ok غير متصل
عضو
مسافر دائم
 
معلومات العضو
التسجيل: Feb 2015
العضوية: 27130
المشاركات: 892 [+]
بمعدل : 0.68 يوميا
اخر زياره : [+]
افتراضي

انا احترم وجهة رايك وشرحك حلو ومفصل
بس على طار الاماكن الترفيهه في مدينة ملاهي ضخمه وقايبله للتوسعه وفي مدينة مائيه ضخمه وقابله للتوسعه ايضا يعني عندكم دريم بارك واكوابارك وحديقة الحيوان والحي الثقافي وجزيرة الؤلؤه كلها من افضل الاماكن في قطر واماكن ترفيهيه داخليه جوندلينيا في فيلاجيو لعبة القطار ولعبة سيارات الفورملا ولعبه الي تتشقله والكثير الكثثر وللاطفال جنغل زون جدا حلوه

طبعا هناك 7 مولات تحت الانشاء منهم 2 كبيرين جدا اكبر من السيتي سنتر والافتتاح تدريجيا مابين 2011 و 2013

رد مع اقتباس
  #5  
قديم 02-28-2015, 01:58 AM
عيد824
عيد824 غير متصل
عضو
مسافر متميز
 
معلومات العضو
التسجيل: Feb 2015
العضوية: 22111
المشاركات: 497 [+]
بمعدل : 0.38 يوميا
اخر زياره : [+]
افتراضي

الحمدالله على السلامه اخت قصمنجيه وأعتذر لحذفي بعض الردود وتنسيق بعضها لخروجها عن الموضوع

رد مع اقتباس
  #6  
قديم 02-28-2015, 01:58 AM
قصمنجية
قصمنجية غير متصل
عضو
مسافر جديد
 
معلومات العضو
التسجيل: Feb 2015
العضوية: 22261
المشاركات: 15 [+]
بمعدل : 0.01 يوميا
اخر زياره : [+]
افتراضي

مشكور اخوي ذا روك

وان شاء الله اذا ربي كتب لنا عمر نجي نشوفها بعد 6 اعوام اكيد بتكون احلى واشياء كثيره فيها ..

يمكن تكون هذي اخر روحه لنا لدوله خليجيه ويمكن تكون البحرين هي اخر دوله ..

رد مع اقتباس
  #7  
قديم 02-28-2015, 01:58 AM
قصمنجية
قصمنجية غير متصل
عضو
مسافر جديد
 
معلومات العضو
التسجيل: Feb 2015
العضوية: 22261
المشاركات: 15 [+]
بمعدل : 0.01 يوميا
اخر زياره : [+]
افتراضي

المشاركة الأصلية كتبت بواسطة عيد824 الحمدالله على السلامه اخت قصمنجيه وأعتذر لحذفي بعض الردود وتنسيق بعضها لخروجها عن الموضوع الله يسلمك ..
ومشكوووور اخوي زين ما سويت ..


رد مع اقتباس
  #8  
قديم 02-28-2015, 01:58 AM
عبدالله منصوري
عبدالله منصوري غير متصل
عضو
مسافر متميز
 
معلومات العضو
التسجيل: Feb 2015
العضوية: 73581
المشاركات: 124 [+]
بمعدل : 0.10 يوميا
اخر زياره : [+]
افتراضي

أختي قصمنجية الحمدلله على السلامه،،
ربي يعطيج العاااافيه وماقصرتي،، أول شيء أعاتبج بصراااحه لانج ما سألتينا قبل لا تروحين،، والله كان حصلتي على الي يطيب خاطرج أنتي وعيالج من ناحية السكن والترفيه،، فمثلاً الحدائق عندنا من أروع الحدائق في دول الخليج وهي حديقة أسباير جنب الفيلاجيو مول وعندنا حديقة دحل الحمام وغيرها الكثير من الحدائق، بالنسبة للالعاب عندنا في السيتي سنتر قسم صغيرروون للالعاب بس روعه عندج في فيلاجيو وفي حياة بلازا في جنغل زوون، المطاعم عندنا مطاااعم أحلى من ليالي وأرخص بعد، السكن عندنا فنادق تتمتعين فيها بالرفاهية وراحة البااال وبأسعار معقوله،، عندج المتحف الاسلامي وهو شيء روعه وخيااال، (فالخيارات متعدده لكن يبقى السؤال ويقولج الي يسأل ما يتووه)،،
ربي يعطيج العاااافيه وماقصرتي،،

رد مع اقتباس
  #9  
قديم 02-28-2015, 01:58 AM
طالبكم
طالبكم غير متصل
عضو
مسافر
 
معلومات العضو
التسجيل: Feb 2015
العضوية: 19731
المشاركات: 62 [+]
بمعدل : 0.05 يوميا
اخر زياره : [+]
افتراضي

من شفت السالفة فيه قصمنجيه دخلت ع طوووووول
لاحظت اغلبهم معاهم سيارات جيب يعني في المواقف والاشاره بين جيب وجيب .. جيب هههه
الجيوب عليها طلب كبير .. الله يهنيهم ..
شبابهم للحين محافظ على الزي الرسمي ثوب وشماغ الله لا يغير عليهم .. ^^
صحيح أنا ملاحظ ذا الشيين اللي حطيتيهم ..
مررره وبقووه ما شاء الله عليهم
شفتهم بكل مكان وأي حزه ما فيه مشكله طاق الرسم لو في الصناعيه والا عند الخباز
أما عندنا تلقى الواحد ما يصدق ع طول يجدع الشماغ والعقال ههههههههه
أشكرك ع التقرير المختصر..
المره الثانيه لازم توثقين بالصور
لا تنسين همااه

رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة

الانتقال السريع

مواقع صديقة :

سفاري للسفر و السياحة



جميع الأوقات بتوقيت GMT +3. الساعة الآن 06:05 PM.


بدعم من vBulletin
الحقوق محفوظة لـ ©2000 - 2018، Jelsoft Enterprises Ltd


Search Engine Friendly URLs by vBSEO 3.6.1